علاش الإنسان يلزمو يحافظ على النحل؟
فما بعض كائنات تسمى الأنواع المحورية أو الأنواع الرئيسية.. Espèces clef de voute.. هوما كائنات حية تلعب دور محوري و كبير في الطبيعة… بحيث إذا اختفت هذه الكائنات ضاعت التوازنات البيئة مما يأدي إلى إنقراض عديد الكائنات الأخرى المرتبطة مباشرة و غير مباشرة بها.
الإسم الفرنسي للكائنات هاذم (clef de voute) أو الإنڨليزي (keystone) يستعمل تشبيها بالحجر اللي كانوا قبل يبنيو بيه أقواس الأبواب.. الحجر اللي يجي في وسط القوس.. و اللي إذا يتنحى يطيحو معاه جميع أحجار القوس.
من أهم الكائنات المحورية.. النحل.. مع غيرو من الدبابير و الحشرات الأخرى يساهمو في تلقيح و تكاثر أغلب أنواع النباتات.. انقراض النحل يأدي إلى انقراض عديد الأنواع النباتية.. اختفاء أو تناقص النباتات يأدي في مرحلة أولى إلى اختفاء الحيوانات اللي تعيش على النباتات و منهم الإنسان..
تناقص النبات يؤدي كذلك إلى تهاوي المنظومات البيئية الموجودة في التربة و اللتي تحوي كائنات مجهرية مثل الفطريات و البكتيريات المحللة.. مما يساهم في فقدان خاصيات التربة و الأرض.. كم أنو تناقص النباتات يحدث خلل في انتاج الأكسيجين و امتصاص الكربون و التحكم في سيلان المياه و حتى في حرارة الجو.. من الصعب تخيل الحياة على الأرض في غياب النحل و النباتات اللتي يلقحها..
رغم أهمية هذه الأنواع المحورية لحياتنا تبقى أعدادها في تناقص مخيف جراء ضغط الإنسان على الطبيعة و تسببو في التغيرات المناخية و التلوث و احتلال تدمير المناطق الطبيعية لهذه الكائنات.. حماية النحل و غيره من الحشرات الملقحة ماهوش خيار… حمايتهم واجبنا قدام الأجيال القادمة.